Медитеранската диета во суштина е микс од навиките за исхрана во повеќе региони долж Медитеранот. Иако Македонија нема море, технички ние сме на околу 2 часа возење од Mare Nostrum (Наше Море), па не би било проблем нутриционистички и пазарно лесно да се вклопиме во оваа диета. Да не правиме муабет дека храната е превкусна…

Историјата и традицијата на Медитеранската диета се тесно поврзани со навиките на јадење на народите кои живеат долж Средоземното море и во суштина таа претставува микс на најдобрите хранителни навики на народите од Грција, Шпанија, Јужна Италија, Мароко. Овој тип на исхрана речиси воопшто не е рестриктивен и на долг рок ќе ви донесе низа здравствени придобивки кои ќе се одразат на вашето здравје и расположение. Гурмани, навалете на вкусовите од Средоземјето, свежите салати со маслиново масло, полномасното сирење, вкусната морска храна и здраво месо, јајцата, овошјето и јаткастите плодови.

Она што е главна карактеристика на медитеранската диета е тоа што нема речиси никакви рестрикции кон одредени типови на храна (наспрема други) што ја прави комплетно одржлива и лесна за практикување. Од друга страна таа ни малку не заостанува зад останатите диети и начини на исхрана кои промовираат губење на телесна тежина и противвоспалителни (антиинфламаторни) својства.

Листата на тоа што се спаѓа и може да се употребува во овој тип на исхрана е навистина долга. Во основа, ваквиот тип на диета е исклучително богат со растителни влакна, има голема микронутритивна вредност, содржи одлични извори на протеини и здрави масти и сето тоа надополнето со по некоја чашка црвено вино. Идеално зар не? Ајде да погледнеме што се вклучува пирамидата на медитеранската диета.

Храна која може да се употреба:

• Риба и морска храна
• Зеленчук и овошје без никакви ограничувања
• Јајца, пилешко месо, сирење, јогурт
• Семиња и јаткасти плодови
• Легуминози и мешунки (грав, грашок, боранија)
• Интегрални житарки и компир (интегрален ориз и брашно)
• Здрави масти – авокадо, маслиново масло, кокосово масло, путер
• Сите видови билки и зачини

Храна која не треба да се употребува:

• Сите видови на преработени шеќери
• Рафинирани житарки вклучувајќи бел леб и бел ориз (нивната употреба е дозволена во екстремно мали количини)
• Сите типови на преработена храна
• Месни преработки и транс масти (маргарин)
• Рафинирани растителни масла

Лесно може да се забележи дека всушност оваа исхрана е враќање на човекот во периодот пред индустријализацијата и појавата на готова и полуприготвена храна која е преполна со шекери, сол и адитиви.

На долг рок ваквиот начин на исхрана ќе ви помогне да ги намалите килограмите, да превенирате рак, да ја редуцирате можноста за појава на дијабет Тип2. Наполнете ги чиниите според вашите потреби и уживајте во придобивките на овој здрав начин на исхрана.

На Здравје!