За многумина од нас, пиењето кафе е незаменлив ритуал во денот кој во голема мера влијае на нашето расположение, фокус и нивото на енергија. Меѓутоа, со години се водат различни контроверзии за тоа дали е безбедно да се ужива во овој популарен пијалок за време на бременоста, односно каков ефект може да има врз здравјето на бебето, но и на идната мајка.

Пиење кафе за време во бременоста!

Иако кафето има свои придобивки, постои загриженост дека внесувањето кафе за време на бременоста може да има штетно влијание, особено врз здравјето на бебето.

Некои од негативните ефекти на кофеинот врз здравјето на мајката вклучуваат висок крвен притисок, анксиозност, вртоглавица, забрзан пулс и абдоминална болка или дијареа. Покрај тоа, молекулите на кофеинот можат слободно да поминат низ плацентата и да навлезат во крвотокот на бебето , што го поставува прашањето како кофеинот може да влијае на здравјето на бебето.

Досега, научниците спроведоа бројни студии за внесот на кафе, односно кофеин, за време на бременоста, а особено беше испитана поврзаноста со ризикот од спонтан абортус и ниска родилна тежина. Резултатите од некои студии покажаа дека постои поврзаност помеѓу прекумерното внесување кафе и ризикот од спонтан абортус и ниската родилна тежина. Сепак, се смета дека постоечките докази не се доволни за да се даде единствено мислење за негативното влијание на кафето за време на бременоста и дека се потребни повеќе истражувања.

Што велат упатствата?

Според сегашните упатства на Светската здравствена организација ( СЗО ), на бремените жени им се препорачува да го ограничат внесот на кофеин на не повеќе од 300 mg на ден. Оваа количина на кофеин одговара на консумирање од две до три шолји кафе дневно. Една нова студија се обиде да открие дали внесот на кафе што е поголем од препорачаната дневна количина може да предизвика компликации во бременоста како спонтан абортус или предвремено породување. Резултатите од одредени претходни студии го поврзаа прекумерното внесување кафе за време на бременоста со зголемен ризик од компликации во бременоста , меѓутоа, гореспоменатите студии не ги земаа предвид параметрите како што се консумирање алкохол, квалитетот на исхраната и пушењето.

Во своето истражување, научниците го користеле методот на рандомизација на Мендел, земајќи ги предвид осумте можни генетски варијанти кои ја предвидуваат потрошувачката на кафе кај трудниците и испитувале дали постои поврзаност помеѓу овие генетски варијанти и исходот од бременоста. Резултатите покажале дека зголеменото консумирање кафе не го зголемува ризикот од спонтан абортус, предвремено породување или раѓање на мртво дете. Важно е да се напомене дека истражувањето не опфатило следење на влијанието на внесот на кафе врз различни аспекти на феталниот развој како што се когнитивниот, менталниот или физичкиот развој на фетусот, затоа сепак се препорачува да се следат препораките на Светската здравствена организација.